Elgorriaga

Informazio orokorra

Bailara: Malerreka
Biztanleak: 203 (2017)
Azalera: 3,9 km2

Mendaur eta Askin mendien magalean kokatuta, Ezkurra ibaiaren ondoan dago herria. Elgorriaga herriaren izena elorri gorritik datorrela diote batzuk. Ekialde eta hegoaldean Donezteberekin egiten du muga, iparraldean Sunbilla eta mendebaldean aldiz Ituren du.

Zonaldeko herrietan bezala, lorez apaindutako etxe handiak topatuko ditugu kaleetan zehar. Elgorriaga batez ere bere bainuetxeagatik da ezaguna. Lehen bainuetxea XX. mendearen hasieran eraiki zen, ur sendagarriak gorenen ziren unean honek zituen propietateengatik. Bertan ur mineraletako iturburua dago eta Europako ur gazienak dira, 14º eta 16º C bitarteko tenperatura dutela azaleratzen dira. Egun, bainuetxe berri bat dago bertan. Bertatik Ezkurra ibaian gora joaten den Uraren Bidea (8km) pasatzen da, ibilaldi bat egin eta inguruko paisaiak ezagutzeko aukera ederra da.

Bestak

Herriko bestak: Uztailaren 25ean, Santiago Apostoluaren egunean ospatzen dira. Hiru-lau egun irauten dute eta zikiro egunarekin bukatzen da.

Inauteriak: Urtarrilaren hirugarren aste bukaeran ospatzen dira.

Bertze bestak

San Juan suak: Ekainaren 23 arratsean. San Juan suen aitzinetik, afari-merienda herrikoia izaten da, bakoitzak etxetik zerbait eramaten duelarik. Gero, frontoian, jan ondoren, suan salto egiten da.

Onddo eta Zizen Kofradiaren besta: Urriko lehen aste bukaeran izaten da.

Urte berri eguna: Urtarrilaren 1ean “Urte berri-berri” kantatuz etxetik etxera eskean joaten dira herritarrak eta urtatxak botatzen dira haurrak jaso ditzaten.

Interes turistikoa duten lekuak

San Pedro eliza

XVI. mendekoa da eta harrizko zutabez osaturiko ataria, nabe bakarra eta kanoi-ganga ditu. Bertan, XVII. Mendearen lehen erdiko erretaula zentrala gordetzen da, eta XVII. mendearen bigarren erdiko San Ferminen eta San Frantziskoren irudi bana.

Erdi-aroko zubia

Elgorriagak harrizko zubi eder bat du du, Ezkurra ibaia zeharkatzeko egina. Puntu erdiko arkua nabarmentzen da eta bertatik joaten da Uraren Bidera.

Uraren bidea

Uraren bideak 8km ditu eta Ezkurra ibaian gora joaten da. Donezteben hasi eta Zubietaraino iritsi daiteke, Elgorriaga eta Iturenetik pasatuz. Markatutako ibilbide lineala eta erraza da, ibilbide atsegina Malerrekako zonalde honetako herri eta paisaiak ezagutzeko.

Zerbitzuak

Kokapena

Informazio gehiago

Elgorriagako Udala

www.elgorriaga.es

Tel. 948 45 04 54

elgorriaga@infolocal.org