Bidexkak, mendiak eta errekak jauregi eta baserri handiak inguratzen dituzte Baztanen. Berezi bezain ederra den bailara, berezko izaera duten lur hauek historiako gertaera garrantzitsuen testigu ere izan dira; Nafarroako Erresumaren azken gotorlekua izan zen eta erromesen, sorginen eta kontrabandisten arrastoa ere nabaria da. Baztanen, nahastu egiten dira kondairak eta pertsonaia mitologikoak eta benetakoak, misterio-kutsua baduen ibarra da. Bidasoa ibaiaren sorburua ere Baztanen dago, Erratzuko herrian hain zuzen ere.
Nafarroako udalerririk handiena da Baztan eta 364 kilometro koadroko zabalera du. Hamabost herrik osatzen dute bailara: Oronoz-Mugairi, Arraioz, Irurita, Almandoz, Berroeta, Aniz, Ziga, Lekaroz, Gartzain, Elbete, Arizkun, Azpilkueta, Erratzu, Amaiur eta Elizondo, ibarreko herri handiena dena. Baztango auzotasun eskubideei eutsiz, herritar guztiek dute herri-lurretako belardiak, ura eta egurra erabiltzeko eskubidea.
Egun, Baztanek bisitariari zerbitzu turistiko eta aukera zabala eskaintzen dio; landetxeak, bisita gidatuak, kalitate handiko produktu gastronomikoak, ongi seinaleztatutako mendi ibilbideak, jatetxeak, turismo aktiboa eskaintzen duten enpresak,… kultura-agenda, azokak eta herrietako besten bitartez, Baztan autentikoena ezagutzeko aukera ederra egoten da.
